سندھ بھر کے اراکین اسمبلی کو 11 جولائی 2025، بروز جمعہ کی شام تک ترقیاتی اسکیمیں جمع کرانے کی ہدایت، ہر اسکیم کی مالیت 500 ملین سے زائد نہ ہو: ناصر حسین شاہ

کراچی: وزیر منصوبہ بندی و ترقیات سندھ سید ناصر حسین شاہ نے صوبے بھر کے اراکین اسمبلی کو ہدایت جاری کی ہے کہ وہ اپنی ترقیاتی اسکیمیں 11 جولائی 2025، بروز جمعہ کی شام تک لازمی طور پر جمع کروائیں۔ انہوں نے واضح کیا کہ کسی بھی اسکیم کی لاگت 500 ملین روپے سے زائد نہیں ہونی چاہیے، جبکہ ترجیحاً اسکیموں کی مالیت 300 ملین روپے تک محدود رکھی جائے تاکہ ان پر فوری عمل درآمد ممکن ہو۔ یہ ہدایات انہوں نے ایک اہم اجلاس کی صدارت کرتے ہوئے کہی، جس میں صوبے کے جاری اور آئندہ ترقیاتی منصوبوں کا تفصیلی جائزہ لیا گیا۔ اجلاس میں قائم مقام چیئرمین پلاننگ اینڈ ڈیولپمنٹ (P&D) سجاد حسین عباسی، اراکین سندھ اسمبلی سمیتا افضال، سعدیہ جاوید، حاجی نور احمد بھرگڑی اور دیگر شریک ہوئے۔ ناصر حسین شاہ نے کہا کہ تمام موصولہ اسکیموں کا فوری طور پر تکنیکی و مالی جائزہ لیا جائے گا اور انہیں متعلقہ فورمز کو منظوری کے لیے بھیجا جائے گا تاکہ ترقیاتی عمل کو تیزی سے آگے بڑھایا جا سکے۔ انہوں نے کہا کہ چیئرمین پاکستان پیپلز پارٹی بلاول بھٹو زرداری کی ہدایات پر حکومت سندھ عوامی فلاح و بہبود کے منصوبوں کو اپنی اولین ترجیح بنا چکی ہے۔ انہی رہنما اصولوں کے تحت تمام محکمے بھرپور انداز میں متحرک ہیں اور اراکین اسمبلی کی بروقت شمولیت ترقیاتی اہداف کے حصول میں کلیدی کردار ادا کرے گی۔