کراچی: وزیر توانائی، منصوبہ بندی و ترقیات سندھ سید ناصر حسین شاہ نے کہا ہے کہ اگست کا مہینہ ہمیں پاکستان بنانے اور اس کی حفاظت کی خاطر شہداء کی قربانیوں کی یاد دلاتا ہے۔ معرکہ حق میں ہماری بہادر افواج نے جس جرات، شجاعت اور بہادری کا ثبوت دیا اس نے ناصرف ملک کا نام روشن ہوا بلکہ پوری پاکستانی قوم کا سر فخر سے بلند ہوگیا۔ پوری قوم میں یہ احساس اجاگر ہوا کہ پاکستان ناقابل تسخیر ملک ہے اور اس کی حفاظت محفوظ ہاتھوں میں ہے۔ ان خیالات کا اظہار انھوں نے آج ایس ٹی ڈی سی کے زہر اہتمام محکمہ توانائی کے دفتر میں معرکہ حق اور جشن ازادی کے سلسلے میں منعقدہ ایک تقریب میں مہمان خصوصی کی حثیت سے اپنے خطاب میں کیا۔ اس موقع پر تقریب کے میزبان سی ای او ایس ٹی ڈی سی سلیم شیخ، سیکریٹری محکمہ توانائی سندھ مشتاق سومرو، ایم ڈی تھرکول انرجی بورڈ طارق شاہ، پروجیکٹ ڈائریکٹر ایس ایس ای پی محفوظ احمد قاضی، سندھ ٹرانسمیشن ڈسپیج کمپنی کے سیکریٹری عمر نواز شیخ، سی ایف او سجاد احمد جونیجو اور سینئر جی ایم ٹیکنکل طارق سعید کے علاوہ دیگر افسران بھی شریک تھے۔ اسی موقع پر وزیر توانائی ناصر شاہ نے معرکہ حق اور جشن آزادی کے مناسبت سے کیک کاٹا اور ایک دوسرے کو کیک کھلا کر مبارکباد پیش کی جبکہ ایس ٹی ڈی سی کے سی ای او سلیم شیخ کی جانب سے تقریب میں بیچ بھی تقسیم کئے گئے۔
